ទីតាំងភ្នាល់ទឹកភ្លៀងរបស់លោកសួរ បានបើកដំណើរការដោយរលូនខណៈអាជ្ញាធរមូលដ្ឋានខណ្ឌ៧មករាគ្មានចំណាត់ការណាមួយឡើយ

(រាជធានីភ្នំពេញ)៖ ទីតាំងល្បែងស៊ីសងភ្នាល់ទឹកភ្លៀងជាច្រើនកន្លែងស្ថិតនៅក្នុងបរិវេណសង្កាត់វាលវង់ខណ្ឌ ៧មករាកំពុងតែបើកដំណើរការលេងនិងអាចដំណើរការយ៉ាងរលូនដែលល្បែងនេះចាប់ផ្ដើមលេងពីខែឧសភាដល់ខែតុលាជារៀងរាល់ឆ្នាំក៏ប៉ុន្តែអាជ្ញាធរមូលដ្ឋានមិនព្រមចុះបង្ក្រាបឡើយ។ បច្ចុប្បន្នល្បែងភ្នាល់ទឹកភ្លៀងនេះ គេបានពង្រីកការគ្រប់គ្រងអាជីវកម្មល្បែងតាមម៉ាស៊ីនអេឡិចត្រូនិចតាមរយៈអ៊ីនធឺណិតអនឡាញក្នុងស្រុកនិងឆ្លងដែនក្រៅប្រទេសហាក់ដូចជាមិនខ្លាចញញើតច្បាប់របស់ព្រះរាជាណាចក្រកម្ពុជាទាល់តែសោះ។

ទីតាំងភ្នាល់ទឹកភ្លៀងតាមម៉ាស៊ីនអេឡិចត្រូនិច និងតាមរយៈអ៊ីនធឺណិតអនឡាញនេះបានបើកដំណើរការហើយស្ថិតនៅក្នុងសង្កាត់អូរឫស្សីទី២ ខណ្ឌ ៧មករារាជធានីភ្នំពេញហើយស្ថិតក្រោមការគ្រប់គ្រង និងសម្របសម្រួលពីសំណាក់បុគ្គលឈ្មោះ ឆៃ ហួត (លោកសួរ) និងមានថៅកែធំម្នាក់ដែលគ្រប់គ្រងម៉ាស៊ីននៅក្រៅប្រទេសក្នុងនោះការភ្នាល់ទឹកភ្លៀងតាមម៉ាស៊ីនអេឡិចត្រូនិច អ៊ិនធើណេតអនឡាញតាមរយៈការបើកគណនេយ្យដើម្បីដាក់ប្រាក់តម្កល់ចូលលេង។

ក្រុមអ្នកលេងភ្នាល់ទឹកភ្លៀងបានបញ្ជាក់ថា ការភ្នាល់ទឹកភ្លៀងតាមម៉ាស៊ីនអេឡិចត្រូនិក អ៊ិនធើណេតអនឡាញគឺភ្នាល់តាម App ឈ្មោះថា(CKW) ដែលគេអាចទាញយកបានតាមរយៈការផ្តល់ link សម្រាប់ download។ ក្នុងមួយថ្ងៃៗ ការភ្នាល់ទឹកភ្លៀងតាមរយៈម៉ាស៊ីនអេឡិចត្រូនិក អ៊ិនធើណេតអនឡាញមានចំនួនទឹកប្រាក់រាប់លានដុល្លារ ហើយក៏មានអ្នកជួយបិទបាំង និងអាចមានមន្ត្រីខិលខូចនៅពីក្រោយទើបពួកគេអាចសើចសប្បាយក្អាកក្អាយ។

សូមបញ្ជាក់ថា ឱ្យតែដល់រដូវភ្លៀងមកដល់គេតែងតែឃើញអ្នកញៀនល្បែងភ្នាល់ទឹកភ្លៀងលេងស្ទើរគ្រប់កន្លែងនៅរាជធានីភ្នំពេញហើយល្បែងភ្នាល់មួយកំពុងតែពេញនិយមសម្រាប់អ្នកញៀននឹងល្បែងភ្នាល់មេឃនេះខ្លាំងណាស់មិនថាប្រជាពលរដ្ឋឬសមត្ថកិច្ចនោះទេ។

បច្ចុប្បន្នល្បែងភ្នាល់ទឹកភ្លៀងតាមម៉ាស៊ីនអេឡិចត្រូនិក អ៊ិនធើណេតអនឡាញកំពុងបើកដំណើរការយ៉ាងរលូននៅចំណុចផ្សារអូរឫស្សី២ ខណ្ឌ៧មករា រាជធានីភ្នំពេញ ដែលមានការភ្នាក់ងារស៊ីសងក្នុងមួយថ្ងៃរាប់លានដុល្លារដែលក្តីព្រួយបារម្ភផងដែរបានជះឥទ្ធិពលដ៏អាក្រក់ដល់ការថែរក្សាការពារសន្តិសុខសណ្តាប់ធ្នាប់សាធារណៈ និងរបៀបរៀបរយក្នុងសង្គម និងបទល្មើសផ្សេងៗ៕